LIVERPOOL FOOTBALL CLUB PROFILE

A TIRIN......JOHN HOULDING....
England ah kum 1888 khan Football League hi din a ni a. Anfield hi League khelh tanna hmun te zinga pakhat a ni thin. League Football an khelh ni hmasa ber, Setember ni 8, 1888, Inrinni a lo thlen chuan Anfield ah hian Accrington chu ‘Reds’ ni lovin ‘Blues’-Everton FC khel tura lo lawmluh a nih chu.

Liverpool khua a Football Club lo awm theihna chhan chu khatih laia St.Domingo Kohhran Pastor Reverend Chambers leh John Houlding, Tory MP, Liverpool khaw Mayor te niin, Houldinga vang bawk hian engemawchen hnuah Everton FC chuan Anfield an chhuahsan a, Liverpool Football Club hi a lo ding ta a ni.

A tirah St. Domingo Football Team hi Liverpool khaw thalaiten infiamna thianghlim hmanga nun kawng dik leh sakhuana kawng tha taka an zawh theihna hmanrua atana din a ni! Amaherawhchu he team hi Biak inah kalkhawm lovin Village Street-a Queen’s Head Hotel ah an inhmukhawm thin a. Hei hi “Ye Anciente Everton Toffee House” an tih bul chiah a awm a nih vangin Everton FC hian ‘Toffees’ tia koh a hlawh phah ta reng a ni.

Kum khat emaw lek Stanley Park ah phur takin an han khel ve a,mahse inkhelh nia entute an bengchhen thin avangin helaiah hian lawm an hlawh vak lova, tichuan an lo chawr chhuahna Kohhran awmna hmun hming chawiin Everton Football Club tiin an inphuah ta a.He team thar hi hmun hrang hrangah an lo inkhel kual ve tawh thin a, a tawpah chuan Anfield Road leh Walton Breck Road inkara hmun hring cham durh mai ah chuan an in bengbel ta a, Football khawvela hming ropui ANFIELD hi a lo piang ta a ni.

Kum 1891 phei kha chuan kawr pawl leh var tial ha Everton FC chuan League Championship lain an hming an chher hle nghe nghe a ni. An President John Houlding-a kaihhruaina fing tak azarah Club chu a thang duangin sum lamah pawh an ngialnghet hma hle a ni.
Mak angreng tak chu John Houlding hian mite chawimawi a hlawh lo viau mai a, Anfield-a Director’s Lounge kawtah a awmbawr lim dara siam an dah leh Club Museum-a a lemziak an dah that tih mai loh chu, Everton thanlenna atan leh Liverpool FC lo dinna atana mi pawimawh hian fak a hlawh tam lo hle mai. Kawtthler tetakte ‘Houlding Street’ an tiha Houldinga ta Sandon Pub leh a hnunglama bowls pavillion ah hian Everton FC meeting hi vawi tamtak an lo nei tawh thinin kum tamtak chu Players te Dressing room anga luah a lo ni bawk! Everton FC leh a hnuah Liverpool FC teamte chuan he bowls pavillion ah hian an thlalak hmasa ber an la nghe nghe!

Everton FC dinchhuaktute zinga mi leh Anfield ah hmun an khuar theihna tura buaipuitu ber mah ni se, John Houlding a, an President chuan Board member dangte sawisel a hlawh tan chho viau ta mai a. Hei hian kum 1892-a an buai tak takna a thlen chho ta nghe nghe a ni. John Houlding-a Pub an hman man (rent) mai bakah ama siam ales (beer) chauh an khelmualah hian hralh phal a nih chu hlawkpui hle mahse midangte mit ti mim tu a ni a. Sawisel a hlawh nasa mai ni lovin Liverpool Echo chanchinbuahte hial chhuah a lo ni ta a. Sandon Dressing Room anga hman man lah a sang chho zel bawk si nen buaina a sosang chho zel a........... (Remchangah chhunzawm zel a ni ang)